قصه الشايب حمدان

بسم الله الرحمن الرحيم


حبيت اشاركم في هذي القصه واتمنى انها تعجبكم

بدايه القصه عن شايب اسمه حمدان وهواوي ( قلبه خضر )
ما يشوف بنت الا و ينفتن ومشهور بانه حبيب

فيه بنت ملكعه وراعية مقالب قالت في نفسها انا ليه ما اروح
لهالشايب وامزح معه واضحكه شوي واشوف ردة فعله كيف تكون

راحت له وسلمت عليه كيف حالك يا شايب رد السلام والله
بخير الله يعافيتس وفجأه عطته ظهرها ومشت ولا استئذان ولا شي

ولع الشايب من حركتها قال فيها كم بيت يستعطفها فيها ويقول انها
ذكرته الماضي و اذا ما عطيتيني وجه لحقت باخوي حمود اللي في قبرهـ
ويذكر التاريخ واليوم اللي قابلها فيه ...

يقول الشايب :

يا بنت خذي خاطري وارحميني
لا تجرحين العود بعيونك السـود

غضي نظرك وغطي الوجنتينـي
لعل يوم ٍ جدد الجرح مـا يعـود

يوم انتهى مع مرمسات السنينـي
جتني صواديفه على غير مقصود

باول شهر عشرهـ نهـار الثنينـي
حمدان مروا به على جنازة حمود


البنت كانت تقصد من استفزازهـ انها تجاريه في الشعر وترد عليه
والمسكين ما كان يدري انها شاعره وعلى باله ما خذ راحته في التغزل

ردت عليه وهزأته تقول :


يا شايب الرحمن وينـك ووينـي
عزي لحالك قدمك الباب مسـدود

قلبك عطوف وجــاهـ قلـب ٍ متينـي
والبنت ما تشفق على مغازل العود

حبل الرجا مقطوع بينـك وبينـي
مثل الغليث اللي رعا قلبه الـدود

اقفى شبابـك والعـرب مقبلينـي
يا عود ما يرجع من العمر مفقود


حطمته يوم قالت له انك عود وان الشباب ما يرجع وان ما فيه امل
تعطيه وجه حس العود انه تورط وقال كم بيت يرقع السالفة ..
ويقول لها صدي عني انه ما يبي الغزل بعد ما وصل عمره ثمانين سنه ..

يقول حمدان :


يا بنت صـدي بالعيـون الظليلـه
لا صد عنـك الله نهـار القيامـه

مالي ومالك يالفـروع الطويلـه
لو فيك من رسم البـداوه علامـه

يابنت مـا لـي بالثمانيـن حيلـه
اهدف كما تهدف على البير قامـه

اقفى شبابي والدهر شفـت ميلـه
يالله حسـن الخاتمـه والسلامـه

اعطيك موجز والبضاعـه قليلـه
واخذت لك من صافي الماء سنامه



راحت الايام والشايب مسكين سنه خذله معها شايب
وهي بنت وتقول له كيف اعطي شايب وجه


بعد فتره مرته مرة ثانيه وردت عليه السلام واستفزته وراحت
وخلته ولع الشايب وقال ليه ما ابين لها في كم بيت انها بتشيب
مثلي واني رجال طيب وان الناس تنصاني ومعروف بالكرم واني
ما ابي منها غير التحيه والترحيب ...


يقول حمدان


يا بنت ما جاس الكبـر والخشونـه
وعادت شباب اليوم يجفل من الشيب

ياسرع ما وبلـك تمـزع مزونـه
يالفاتنـه يـا ام الثمـان الرعابيـب

يا بنت مـا بينـي وبينـك مهونـه
كلمة شرف نبي تحيـه وترحيـب

الله مـــن عــــود ٍ ثـــقيـلـه طنـونـه
ينصاهـ راع المشكلـه والمواجيـب

على الكرم والديـن نفسـه حنونـه
تلقاهــ بالاجـواد شـــرق وتغاريـب


جهز الابيات وارسلها مع عجوز ووعد العجوز بهديه اذا وصلت الرساله لها
راحت العجوز وعطت البنت الابيات شافتها البنت وقفلت على العجوز في غرفه
وقالت مثل ما جيتي بابياته ترجعين بابياتي ...
العجوز مسكينه قالت طلعيني ولا ابي منكم شي الله لا يعودكم انتم واوراقكم ..
ردت البنت ابيات اقوى من الاولى واكثر تحطيم ..
مسكين الشايب ما احد رحمه حتى لو حاول يستعطف ...


تقول البنت


العود عــود وطايحـاتٍ سـنــــونـه
من كثر ما يرقد على جرة الذيب

عود ٍ مهرقل والعرب ما يبونـه
ياعود ما لك في طويل المراقيب

اقفى شباب العود راحت حتونه
مثل اليتيم اللي بكا ما له مجيب

جداهـ ينثر دمعـة ٍ مـن عيونـه
غريق موج ٍ ما لقا له مقاضيـب



منقووووووووووووووووووووووووووول